Беларускія нафтавікі пачалі распрацоўку буйнейшага радовішча пяску
Нафтагазаздабыўное ўпраўленне "Рэчыцанафта" пачало распрацоўку кар'ера пяску "Давыдаўка-1", размешчанага паблізу населенага пункта Сасновы Бор у Светлагорскім раёне. Гэта радовішча самае вялікае з тых, што распрацоўвае прадпрыемства, паведамілі БЕЛТА ў прэс-службе "Беларуснафты".
Плошча прадастаўленага зямельнага ўчастка перасягае 20 га. Запасы карыснага выкапня ацэньваюцца ў аб'ёме 1626,57 тыс. куб.м.
Паводле слоў намесніка начальніка аддзела забеспячэння праектна-пошукавых і топа-маркшэйдарскіх работ НГЗУ Аляксандра Несцерчука, тэрмін службы кар'ера "Давыдаўка-1" разлічаны на 10 гадоў. "Якасць пяску не мае аналагаў. У яго складзе прысутнічаюць дабаўкі гравію, што робіць гэты прыродны матэрыял аптымальным для будаўніцтва дарог і пляцовак свідравін", - адзначыў ён.
Максімальная гадавая прадукцыйнасць кар'ера складае 200 тыс. куб.м, удакладніў Аляксандр Несцярчук. "У асноўных работах задзейнічаны два экскаватары, у дапаможных - бульдозер і пагрузчык. Упершыню пры водпуску пяску выкарыстоўваецца электронная вагавая сістэма, афармляюцца электронныя накладныя. Усё гэта робіць улік карыснага выкапню максімальна дакладным і аператыўным", - дадаў ён.
Цяпер у распрацоўцы НГЗУ "Рэчыцанафта" знаходзяцца і кар'еры "Дземяхі-2", "Навінкі", "Давыдаўка-1". Пясок выкарыстоўваецца для падрыхтоўкі пляцовак пад будаўніцтва свідравін, будаўніцтва аўтамабільных дарог для патрэб прадпрыемства.