Навіны

Больш за 55 працэнтаў прышчэпленых ад каранавіруса жыхароў Гомельскай вобласці атрымалі бустарную вакцыну

Больш за 55 працэнтаў жыхароў Гомельскай вобласці, якія прайшлі асноўны курс імунізацыі ад каранавіруса, атрымалі бустарную вакцыну. Аб гэтым паведаміла журналістам намеснік галоўнага ўрача Гомельскага абласнога цэнтра гігіены, эпідэміялогіі і грамадскага здароўя Вольга Тульжанкова, перадае карэспандэнт БЕЛТА.

Паводле слоў Вольгі Тульжанковай, асноўны курс вакцынацыі ў рэгіёне прайшлі больш за 72 працэнты жыхароў.

"На жаль, калі праходзіць паўгода і больш, імунітэт, створаны пры дапамозе асноўнага курса, паступова пачынае зніжацца, і колькасці антыцел у арганізме ўжо недастаткова, каб паўнацэнна адбіць атаку віруса пры яго паступленні ў арганізм", - звярнула ўвагу яна. Для гэтага патрэбна бустарная вакцынацыя.

"На сённяшні дзень бустарную вакцынацыю прайшлі ўжо звыш 40 працэнтаў насельніцтва вобласці, або больш за 55 працэнтаў ад тых, хто атрымаў асноўны курс імунізацыі", - агучыла лічбы намеснік галоўнага ўрача.

Праводзіцца і вакцынацыя дзяцей супраць COVID-19. "Яна праходзіць з канца мінулага года. Пачыналі вакцынацыю дзяцей ва ўзросце 12-17 гадоў. Даволі паспяхова яна паказала сябе. І ў тым ліку па просьбах бацькоў (а было даволі шмат зваротаў ад бацькоў дзяцей больш малодшага ўзросту, мамы і таты хацелі іх абараніць ад захворвання каранавіруснай інфекцыяй) цяпер праводзіцца вакцынацыя пачынаючы з 5-гадовага ўзросту", - расказала Вольга Тульжанкова. Яна ўдакладніла, што на сённяшні дзень у Гомельскай вобласці прышчэплены практычна 39 тыс. дзяцей.

Гаворачы аб эфектыўнасці імунізацыі супраць COVID-19, намеснік галоўнага ўрача нагадала: папярэдняя хваля была ў лютым, і захваральнасць стала ўпэўнена зніжацца з сакавіка - менавіта на той момант у Гомельскай вобласці было вакцынавана ўжо 60 працэнтаў насельніцтва. Таксама свой уклад у імунную праслойку ўнеслі тыя, хто перахварэў у апошнюю хвалю, адзначыла яна.

"Пры фарміраванні імунітэту, гэта датычыцца і каранавіруснай інфекцыі, і іншых інфекцыйных захворванняў, у тым ліку якія кіруюцца сродкамі імунапрафілактыкі, адбываюцца змяненні эпідэміялагічнага працэсу. У той момант, калі фарміруецца даволі вялікая імунная праслойка - так званы калектыўны імунітэт, адбываецца змяненне ўласцівасцей узбуджальніка. Зніжаецца яго заразнасць - вірулентнасць, мяняецца патагеннасць віруса - здольнасць узбуджальніка выклікаць цяжкія формы захворвання. Гэта значыць чым больш імунная праслойка, тым вірус становіцца больш слабым", - растлумачыла Вольга Тульжанкова.

"Што датычыцца захваральнасці як на вострыя рэспіраторныя інфекцыі, так і на каранавірусную, то цяпер прыкметна актывізацыя эпідэміялагічнага працэсу. Я не магу назваць гэта ўпэўненым ростам, але гэта ўжо не тая стабільнасць, якую мы бачылі на працягу лета. І таму менавіта цяпер прафілактыка набірае сваю актуальнасць", - дадала намеснік галоўнага ўрача. І асаблівая роля тут належыць вакцынацыі. "Гэта той метад прафілактыкі, які сапраўды можа засцерагчы ад захворвання. Гэта можна сказаць і пра каранавірусную інфекцыю, і пра грып", - рэзюмавала Вольга Тульжанкова.

БЕЛТА - Навiны Беларусi