Саўмін удакладніў пералікі дакументаў, тэрмін дзеяння якіх прадаўжаецца
Урад удакладніў пералікі дакументаў, тэрмін дзеяння якіх прадаўжаецца. Гэта прадугледжана пастановай Савета Міністраў ад 24 лістапада 2021 года нумар 671, паведамляе БЕЛТА са спасылкай на Нацыянальны прававы інтэрнэт-партал.
Так, пастанова нумар 687 ад 2 снежня 2020 года дапоўнена пералікамі адмінпрацэдур, якія ажыццяўляюцца па заявах грамадзян, а таксама ў адносінах да юрыдычных асоб і ІП, тэрмін дзеяння выдадзеных даведак або іншых дакументаў па якіх аднаразова прадаўжаецца на шэсць месяцаў, калі заканчваецца з 11 лістапада 2021 года па 26 сакавіка 2022-га ўключна.
У гэты пералік увайшлі 164 працэдуры. У іх ліку прыняцце рашэння аб накіраванні грамадзян, якія знаходзяцца на ўліку маючых патрэбу ў паляпшэнні жыллёвых умоў і маюць права на атрыманне льготных крэдытаў на будаўніцтва (рэканструкцыю) або набыццё жылых памяшканняў, для заключэння дагавораў куплі-продажу жылых памяшканняў, будаўніцтва якіх ажыццяўлялася па дзяржаўным заказе, прыняцце рашэння аб прадастаўленні аднаразовай субсідыі на будаўніцтва (рэканструкцыю) або набыццё жылога памяшкання. Таксама ў пераліку выдача даведак аб знаходжанні на ўліку маючых патрэбу ў паляпшэнні жыллёвых умоў, аб месцы жыхарства і складзе сям'і, аб месцы жыхарства, выдача копіі асабовага рахунку, выдача медыцынскай даведкі аб стане здароўя, выдача і абмен пасведчання на права кіравання механічным транспартным сродкам адпаведнай катэгорыі, падкатэгорыі, выдача і абмен дзяржаўнага пасведчання на права палявання.
Устаноўлены і пералік дакументаў, выдадзеных фіз- і юрыдычным асобам, ІП, іншых рашэнняў, тэрмін дзеяння якіх прадаўжаецца на шэсць месяцаў у адзначаным выпадку.
Дакумент прыняты ў сувязі з унясеннем змяненняў ва ўказ ад 25 лістапада 2020 года нумар 442 "Аб прадаўжэнні тэрміну дзеяння дакументаў".
Пастанова нумар 671 уступае ў сілу пасля яе афіцыйнага апублікавання і распаўсюджвае сваё дзеянне на адносіны, якія ўзніклі з 11 лістапада 2021 года.-0-