Юныя барцы Гомельскай вобласці сталі першымі паўфіналістамі "Лігі храбрых"
10 кастрычніка, Мінск /Кар. БЕЛТА/. Першымі ўдзельнікамі паўфінальнай стадыі другога сезона "Лігі храбрых" сталі юныя барцы Гомельскай вобласці, паведамляе карэспандэнт БЕЛТА.
У стартавай чвэрцьфінальнай сустрэчы гамяльчане ўпэўнена перамаглі каманду Брэсцкай вобласці - 23:6. Іх сапернік па матчы за выхад у фінал вызначыцца 4 лістапада пасля процістаяння барцоў Мінска і Магілёўскай вобласці. У суботу, 21 кастрычніка, пройдзе чвэрцьфінал, у якім сустрэнуцца зборныя Гродзенскай і Мінскай абласцей. Пераможца гэтай пары будзе сапернічаць у паўфінале з пераможцам сустрэчы паміж спартсменамі Віцебскай вобласці і Масквы, якія будуць змагацца 18 лістапада. Спаборніцтвы праводзяцца ў мінскім Палацы барацьбы імя Аляксандра Мядзведзя.
Першымі трыумфатарамі "Лігі храбрых" у мінулым сезоне сталі масквічы, якія ў вырашальным матчы за золата выйгралі ў магіляўчан з вынікам 17:13. Бронзавыя ўзнагароды заваявала каманда Мінскай вобласці, якая ва ўпартай барацьбе перамагла зборную Гродзенскай вобласці - 16:14.
На спаборніцтвах аб'яднаны тры віды барацьбы - вольная, грэка-рымская і жаночая. У склад кожнай каманды ўваходзяць па дзесяць спартсменаў. У агульны залік ідуць вынікі паядынкаў у трох відах. Турнір арганізаваны па сістэме з прамым выбываннем. У гэтым сезоне ў склады каманд уваходзяць юнакі і дзяўчаты 2008-2009 гадоў нараджэння, якія на пастаяннай аснове займаюцца спартыўнай барацьбой.-0-